تبلیغات
سایت ادبیات - ایکی آلما/ ج.مممدقولوزاده// کوچورن: Aydın Muğanlı


مدیر وبسایت : ابراهیم قاسمی
کل بازدید:
بازدید امروز :
بازدید دیروز :
بازدید این ماه :
بازدید ماه قبل :
تعداد کل مطالب :
آخرین بازدید :
آخرین بروز رسانی :

 

«ایکی آلما»

یازان: ج. مممدقولوزاده

کؤچورن: ابراهیم قاسمی (آیدین موغانلی)

آخشام واختلاری گزمه یه چیخاندا،هردن بیر،بالاجا اوغلومودا یانیمجا آپاریرام. بو دفه ده آپاردیم. و همین بالاجا اوغلوم ایله گزمه یه گئدنده،هردن بیر ایتتیفاق دوشورکی، اونا یئملی شئی ده آلیرام کی مندن راضی قالسین. بودفه ده بالاجا اوغلوم دوکانلاردا دوزولموش ناز و نعمتی گؤرنده مندن بیر شئی ایسته دی. من او عقیده ده دئییلم کی، هر دفه اوشاق ایله بازارا گئدنده اونا بیر شئی آلماق لازیمدیر و لاکین بونودا دئمیرم کی، هئچ بیر واخت آلماق لازیم دئییل.

آنجاق بو دفه هئچ بیر زاد آلماق ایسته میردیم؛ او سببه کی، جیبیمده چوخ پولوم یوخ ایدی، و بیرده ایسته مه دیم کی، اوشاقیم هر دفه بازارا چیخاندا "دادام آل" اؤیر نسین.

بیر قه در دولاندیق، سونرا یولوموز چای کنارینا دوشدو. آمما اوغلومودا  بی داماق گؤروردوم. چون تربیه اؤز قایداسینجا، اوشاغین اؤز تربیتی، بودا  اوز قایداسینجا. و اونونچون ده چوخ عیناد ائتمه مک بابتیندن، دریا کناریندا طاباغا دوزولموش میوه لردن ایکی شاهی یا ایکی دنه یاخشی قیرمزی آلما آلدیم و ایکیسینی ده وئردیم اوغلوما. هر چند اوغلوم آلمالاری مندن آلدی، آمما گؤردوم کی، کؤنولسوز آلدی. من اوندان  بی داماقلیغینین سببینی سوروشمادیم، چونکی سببی آشکار ایدی. بازاردا بیر آز بوندان قاباق او مندن ایکی شئی ایستده دی، هئچ بیرینی آلمادیم، سونرا دا نمسه قننادی دوکانینین قاباغیندان کئچنده  شوشه نین دالینا دوزولموش رنگارنگ کانفئت(= شکلات) و شیرینیاتدان ایسته دی، آلمادیم. اوغلوم او درجه ده مندن ناراضی ایمیش کی، من آلمالاری اونا وئرندن سونرا دا، گئنه بیر سؤز دانیشماق ایسته مدی و من  اونا وئردیییم سوآللارا دا  چوخ مئییلسیز جاواب  وئردی. دخی اونو بئله قاشقاباقلی  گؤرنده من اؤزوم ده بی داماق  اولدوم و«آذر­نئفت» ایداره سینین قاباغیندا دوران تراموای واگونلارینین بیرینه اوغلومو قالخیزدیم و اؤزوم ده میندیم کی، گلگ ائویمیزه. واگوندا هله بیزیم ایکیمیزدن باشقا بیرکس یوخ ایدی.

اوغلوم بویدا بیر یئتیم روس اوشاغی جیر- جیندیر ایچینده، اوز- گؤزو قاپ قارا چیرکلی و ایرنج، گلدی دوردو قاباغیمیزدا و مندن قپیک پول ایسته دی. جیبیمده آنجاق بیر عابباسی گوموش پول وار ایدی. من اوشاغا بیر سؤز دئمه دیم کی، کئچیب گئتسین. بیر نئچه مینیک آرواد و کیشی  واگونا گیردیلر و ساغیمیزدا- سولوموزدا یئر توتدولار.

بوردا منیم فیکریم گئتدی یئتیمه پول  وئرمه مییمه و دیلنچییه پول وئرمک لازیمیدی یا لازیم دئییلمی مسله سی منی باشلادی مشغول ائتمه یه. هرکس نه دئییر دئسین، آنجاق دیلنچی اوشاغا هئچ بیر شئی وئرمه مک منیم خوشوما گلمه دی . بوردان اونا ایشاره ائتمیرم کی من هئچ بیر دیلنچییه یوخ دئمه رم؛ چؤنکی اولابیلرکی بیر پارا فیلوسوفلارین دیلنچییه پول وئرمک، اونو بدبخت ائتمک صیفتی بلکه منه ده سیرایت ائدیبدیر. آنجاق  سؤوزون حقیقتی بودورکی بو گونکو دیلنچی اوشاغا بیر قپیک وئرمه مییم منی بورادا خاراب ائتدی؛ او سببه خاراب ائتدی کی همین دیلنچی اوشاق، یاشدا منیم آتالی و آنالی  اوغلوم، اینی- باشی تزه، قارنی توخ، بوساعات بورادا منیم ساغ طرفیمده  مندن اینجیمیش اوتورموشدوکی، نییه من اونا کانفئت آلمادیم، آنجاق ایکی آلما آلدیم.

واگونوموز حرکت ائدیب گئدنده پنجره نین شوشه سینین دالیندان گوردوم کی همین دیلنچی اوشاق ئیرده دوروب قیرمیزی آلمانی  آغزینا باسیب یئییر. قاباقجا بیر شئی دویمادیم؛ آمما همین دقیقه یانیمداکی اوغلومون آلمالاری یادیما دوشدو و چؤندوم اوشاغا طرف. اوغلوم گوله- گوله منه یاواشجا بونو دئدی:

-دده، آلمانین بیرینی وئردیم دیلنچی اوشاغا. بیر دنه قیرمیزی آلما اؤز- اؤزلویونده بی شئی دئییل؛ اونون قیمتی ایکی قییکدیر و یئییب قورتاراندان سونرا هئچ بیر شئی دیر. آمما معنوی ایشلرده بیر آلمانین دیری اولابیلر چوخ بویوک اولسون. او قدر یونگوللوک و کؤنول خوشلوغوکی بورادا ایکی قییکلیک آلمادان منه گلیب چاتدی، نهایت درجه ده ایدی.

فیلوسوفیا عالمینه گلدیکده، قئیریلری دیلنچییه کوچه ده ایعانه وئرمه یی نه جور باشا دؤشورلر دوشسونلر و اینسانییت موتخصصیصلری بو مسله نی نه طوور حلل ایئدیلر، ائتسینلر؛ آنجاق منیم بالاجا اوغلوم ایکی آلماسینین بیریسینی بیر یئتیم اوشاغا وئردی.

و اولابیلرکی، اوغلوم دا بؤیودوکدن سونرا، بیر پارا عالیملرین «کوچه ده دیلنچییه ایعانه وئرمیینیز» نصیحتینی ائشیدندن سونرا، اونلاری کوچه ده گؤورنده منیم کیمی اوز چؤندرجکدیر. آنجاق هله کی، ایندی اوغلوم بو ایشلری  باشا دؤشمور و اونونچون دا ایکی آلمانین بیرینی  یئتیم اوشاغا وئریر.

«سون»

 

 



نوشته شده توسط ابراهیم قاسمی در دوشنبه 17 فروردین 1394 و ساعت 12:41 بعد از ظهر [+] | نظرات ()
Copyright © 2009- sinaylin™
نظر شما در مورد مطالب سایت؟