تبلیغات
سایت ادبیات - «خان ننه»


مدیر وبسایت : ابراهیم قاسمی
کل بازدید:
بازدید امروز :
بازدید دیروز :
بازدید این ماه :
بازدید ماه قبل :
تعداد کل مطالب :
آخرین بازدید :
آخرین بروز رسانی :

اوستاد شهریاردان ابدی بیر شعیر

 

«خان ننه»

 

خان ننه ، هایاندا قالدین

بئله باشیوا دولانیم

نئجه من سنی ایتیردیم !

دا سنین تایین تاپیلماز.

سن اؤلن گون ، عممه گلدی

منی گتدی آیری کنده

من اوشاق ، نه آنلایایدیم ؟

باشیمی قاتیب اوشاقلار

نئچه گون من اوردا قالدیم

 

قاییدیب گلنده ، باخدیم

یئریوی ییغیشدیریبلار

نه اؤزون ، و نه یئرین وار

« هانی خان ننه م ؟ » سوروشدوم

دئدیلر کی : خان ننه نی

آپاریبلا کربلایه

کی شفاسین اوردان آلسین

سفری اوزون سفردیر

بیرایکی ایل چکر گلینجه

نئجه آغلارام یانیخلی

نئچه گون ائله چیغیردیم

کی سسیم ، سینم توتولدو

«او ، من اولماسام یانیندا

اؤزی هئچ یئره گئده نمز،

بو سفر نولوبدو ، من سیز

اؤزو تک قویوب گئدیبدیر ؟»

 

هامیدان آجیق ائده ر کن

هامییا آجیقلی باخدیم

سونرا باشلادیم کی : « منده

گئدیره م اونون دالینجا»

دئدیلر : «سنین کی تئزدیر،

امامین مزاری اوسته

اوشاغی آپارماق اولماز

سن اوخی ، قورآنی تئز چیخ

سن اونی چیخینجا بلکی،

گله خان ننه ن سفردن!»

تلسیک روانلاماقدا

اوخویوب قورآنی چیخدیم

کی یازیم سنه : «گل ایندی

داها چیخمیشام قرآنی،

منه سوقت آل گلنده!»

آما هر کاغاذ یازاندا

آقامین گؤزو دولاردی

سنده کی گلیب چیخمادین

نئچه ایل بو اینتیظارلا

گونی ، هفته نی سایاردیم

تا یاواش یاواش گؤز آچدیم

آنلادیم کی ، سن اؤلوبسن !

بیله بیلمییه هنوزدا

اوره گیمده بیر ایتیک وار

گؤزوم آختارار همیشه

نه یاماندی بو ایتیکلر

خان ننه جانیم ، نولئیدی

سنی بیرده من تاپایدیم

او آیاقلار اوسته ، بیرده

دؤشه نیب بیر آغلایایدیم

کی داها گئدنمه ییدین!

...

1355



نوشته شده توسط ابراهیم قاسمی در دوشنبه 16 دی 1392 و ساعت 10:32 قبل از ظهر [+] | نظرات ()
Copyright © 2009- sinaylin™
نظر شما در مورد مطالب سایت؟